Një alarm për mjet të dyshuar shpërthyes ka shkaktuar mobilizimin e forcave të Policisë së Kosovës pasditen e së enjtes në Stacionin e Autobusëve në Prishtinë. Informacioni për këtë rast është pranuar nga autoritetet rreth orës 16:30.
Sipas zëdhënësit të Policisë për rajonin e Prishtinës, Enis Pllana, njësitë policore kanë ndërmarrë menjëherë masat e nevojshme të sigurisë. Pas pranimit të njoftimit, është bërë sigurimi i perimetrit të zonës, ndërsa njësitë përkatëse kanë filluar procedurat e kontrollit për të verifikuar vërtetësinë e kërcënimit.
Pas përfundimit të kontrolleve në vendin e ngjarjes, alarmi është konstatuar si i rremë. Ky incident i bashkëngjitet një sërë njoftimesh të ngjashme që janë raportuar kohët e fundit në lokacione të ndryshme, të cilat kanë kërkuar angazhimin e vazhdueshëm të strukturave të sigurisë për të garantuar mbrojtjen e qytetarëve.