Deputetja britanike Alicia Kearns ka reaguar ndaj deklaratave të ministres së Administratës Publike dhe Vetëqeverisjes Lokale të Serbisë, Snezhana Paunoviq. Ministrja serbe pretendoi se, po të ishte në vend të Sllobodan Millosheviqit në vitin 1998, do ta kishte kryer spastrimin etnik të Kosovës.
Përmes një postimi në rrjetin social X, Kearns e cilësoi mbështetjen e Paunoviqit për spastrimin etnik si "një njollë për Qeverinë e Serbisë". Ajo theksoi se njerëzit që sot janë në të tridhjetat i kujtojnë ende mizoritë që forcat e regjimit të Millosheviqit kryen ndaj tyre dhe familjeve të tyre.
"Nuk ka asnjë përpjekje për t’i justifikuar – e aq më pak për t’i lavdëruar – këto krime që mund ta bëjë botën të harrojë atë që ndodhi në Kosovë", u shpreh Kearns, duke përmbyllur mesazhin e saj me thirrjen "Mos harroni kurrë".
Deklarata e ministres serbe është dënuar nga Bashkimi Europian, ndërsa ka nxitur reagime të shumta në Kosovë dhe në kryeqendra të ndryshme evropiane si një përpjekje për të relativizuar krimet e luftës.