Ambasada e Shteteve të Bashkuara në Tiranë ka publikuar një njoftim zyrtar lidhur me praktikën e shtetasve shqiptarë që udhëtojnë drejt SHBA-së me viza turistike për të lindur fëmijë. Sipas njoftimit, një numër prindërish shfrytëzojnë programin publik Medicaid për të përballuar kostot e kujdesit shëndetësor gjatë lindjes, duke i rënduar kështu buxhetin taksapaguesve amerikanë.
Institucioni diplomatik bën me dije se një veprim i tillë mund të ndikojë negativisht në të drejtën e këtyre individëve për të rinovuar vizat e tyre në të ardhmen. Në reagimin e publikuar, thuhet se prindërit që veprojnë në këtë mënyrë rrezikojnë të mos kualifikohen për pajisje me viza të reja.
Autoritetet amerikane kanë rikujtuar rregullat mbi përdorimin e vizave turistike, duke theksuar se këto të fundit nuk duhet të përdoren për qëllime që bien ndesh me arsyen e udhëtimit të deklaruar gjatë procesit të aplikimit. Qytetarët janë këshilluar të ndjekin rrugët ligjore dhe të jenë të saktë në deklaratat e tyre, pasi shkelja e kushteve të vizës mund të sjellë pasoja për mundësinë e udhëtimit të tyre në të ardhmen.