Ambasada e Shteteve të Bashkuara në Tiranë ka reaguar në 27 janar 2026, në Ditën Ndërkombëtare të Përkujtimit të Holokaustit, duke nderuar 6 milionë viktimat hebreje të kësaj periudhe.
Në mesazhin e saj në rrjetet sociale, ambasada rikujton deklaratën e Sekretarit të Shtetit Marco Rubio: “Antisemitizmi nuk ka vend në këtë botë”. Ajo thekson se Shtetet e Bashkuara mbeten të përkushtuara për t’u përballur me antisemitizmin dhe shtrembërimin e Holokaustit.
Ambasada vlerëson historinë e veçantë të Shqipërisë si një nga vendet e pakta të pushtuara nga nazistët ku hebrenjtë gjetën strehim. Kjo u bë e mundur falë guximit të shqiptarëve të zakonshëm, të cilët i mbrojtën ata gjatë Luftës së Dytë Botërore.
Po ashtu, ambasada mirëpret partneritetin e vazhdueshëm të Shqipërisë në luftën kundër antisemitizmit. Si shembull përmendet miratimi vitin e kaluar i Praktikave më të Mira për Parimet e Konferencës së Uashingtonit mbi Artin e Konfiskuar nga Nazistët, të cilat çojnë përpara drejtësinë dhe kompensimin për pronën kulturore të periudhës së Holokaustit.
Mesazhi nënvizon përgjegjësinë e përbashkët për të kujtuar të kaluarën dhe për të ndërtuar një të ardhme pa dhunë e urrejtje.