Në Strasburg u mbajt ceremonia e parë e dhënies së Urdhrit Evropian të Meritës. Ish-kancelarja gjermane Angela Merkel u nderua me nivelin më të lartë të këtij urdhri, "Anëtare me Merita të Urdhrit". Dekorata u krijua vitin e kaluar dhe Merkel është mes 20 personaliteteve të para që e marrin atë.
Bashkë me Merkelin u nderuan edhe presidenti ukrainas Volodymyr Zelensky dhe ish-presidenti polak Lech Walesa. Walesa mori pjesë në ceremoni, ndërsa Zelensky mungoi. Çmime të tjera iu dhanë përfaqësuesve të institucioneve evropiane, shkencëtarëve dhe artistëve, përfshirë grupin U2 me vokalistin Bono.
Në fjalimin e saj, Merkel theksoi se premtimet e paqes, mirëqenies dhe demokracisë janë të kërcënuara. Ajo paralajmëroi për ndikimin e rrjeteve sociale ku faktet humbasin vlerën e tyre dhe për rreziqet që sjell inteligjenca artificiale. Presidentja e Parlamentit Evropian Roberta Metsola tha se Evropa është ndërtuar me traktate dhe me zgjedhjen e solidaritetit.