Anija turistike luksoze Seven Seas Splendor, në pronësi të kompanisë Regent Seven Seas Cruises, ka mbërritur për herë të parë në Portin e Durrësit me rreth 650 pasagjerë në bord.
Kryeministri Edi Rama ndau pamje nga mbërritja e turistëve, duke nënvizuar se përfaqësuesit e kompanisë kanë vlerësuar kushtet dhe facilitetet e ofruara në port. Vizita u shënua përmes ceremonisë tradicionale "Maiden Call", ku morën pjesë Drejtori Ekzekutiv i Autoritetit Portual Durrës, Liburn Aliu, dhe Kapiteni i Portit, Taulant Allka.
Gjatë qëndrimit në Shqipëri, vizitorët do të kenë mundësi të vizitojnë atraksionet kryesore historike dhe arkeologjike, duke përfshirë qytetin antik të Durrësit, Kalanë e Krujës dhe qendrën muzeale të Beratit.
Sipas autoriteteve, mbërritja e kësaj kroçereje dëshmon trendin pozitiv të turizmit detar. Një risi për këtë sezon është fakti që kompania Regent Seven Seas Cruises ka nisur imbarkimin e 80 pasagjerëve nga Porti i Durrësit, duke forcuar rolin e portit në itineraret ndërkombëtare të lundrimit.