Apeli i Posaçëm ka vendosur përfundimisht kalimin në favor të shtetit të 22 pasurive në pronësi të Gramoz Totos dhe familjarëve të tij, duke lënë në fuqi vendimin e mëparshëm të Gjykatës së Posaçme kundër Korrupsionit dhe Krimit të Organizuar (GJKKO). Gramoz Toto është dënuar më parë me 18 vite burg nga drejtësia italiane për veprën penale të shfrytëzimit të prostitucionit, në kuadër të një grupi të strukturuar kriminal.
Pasuritë e konfiskuara përbëhen nga 16 prona të paluajtshme dhe 6 automjete. Mes objekteve të sekuestruara janë:
• Troje dhe ndërtesa në Dushnik të Beratit;
• Tokë arë me sipërfaqe 6,500 metra katrorë;
• Godina, objekte shërbimi dhe një kompleks sportiv;
• Apartamente dhe ndërtesa në rrugën “Çlirimi” në Berat;
• Ullishte me sipërfaqe rreth 112 metra katrorë dhe objekte të tjera ndërtimi.
Hetimi pasuror u krye nga prokurori i SPAK, Behar Dibra, duke u bazuar në ligjin Antimafia, pasi u konstatua se pasuria nuk justifikohej nga burime të ligjshme të ardhurash. Në të shkuarën, Gramoz Toto ka qenë edhe subjekt i Operacionit Forca e Ligjit (OFL). Tashmë, administrimi i këtyre pronave do të bëhet nga Agjencia e Administrimit të Pasurive të Sekuestruara dhe të Konfiskuara.