Policia e Tiranës sekuestroi një automjet tip BMW M-8, me vlerë rreth 140 mijë euro, i cili rezultoi i vjedhur në Gjermani dhe u trafikua në Shqipëri. Ngjarja ndodhi në kuadër të operacionit policor "Stolen Line", kundër trafikimit të automjeteve luksoze të vjedhura jashtë vendit. Ky është i pesti automjet i sekuestruar që nga nisja e operacionit.
Sekuestrimi u krye në Vorë, ku u ndalua automjeti i drejtuar nga blerësi i tij. Për këtë rast procedohet penalisht shtetasi E. D., 39 vjeç, shqiptar, i cili dyshohet se ka blerë automjetin e trafikuar dhe e drejtonte në momentin e ndalimit. Specialistët e Seksionit për Hetimin e Trafiqeve të Paligjshme identifikuan dhe shpallën në kërkim shtetasin F. H., 42 vjeç, shtetas kosovar, i dyshuar se ka sjellë automjetin në Shqipëri me qëllim shitjen. Policia vijon punën për kapjen e tij.
Materialet procedurale iu referuan Prokurorisë së Tiranës për veprime të mëtejshme, për veprën penale "Trafikimi i mjeteve motorike". Operacioni synon goditjen e rasteve të tilla në Shqipëri, ku automjetet luksoze të vjedhura jashtë shtetit shiten në tregun lokal.