Specialistët e Seksionit për Hetimin e Trafiqeve të Paligjshme, në kuadër të operacionit policor të koduar "Stolen line", kanë finalizuar një tjetër operacion kundër trafikimit të automjeteve të vjedhura jashtë vendit. Nga veprimet procedurale është bërë i mundur sekuestrimi i tre automjeteve të markës Mercedes-Benz, të cilat dyshohet se janë trafikuar në Shqipëri me qëllim shitjen e tyre.
Automjetet e sekuestruara janë:
• Mercedes-Benz G-Class 63 AMG, me vlerë rreth 200 mijë euro;
• Mercedes-Benz GT 63 AMG, me vlerë rreth 150 mijë euro;
• Mercedes-Benz S-Class 580e, me vlerë rreth 100 mijë euro.
Në lidhje me këtë ngjarje, Policia ka shpallur në kërkim shtetasit F. D., 24 vjeç, dhe K. V., 22 vjeç, të cilët dyshohet se kanë kryer trafikimin e automjeteve. Njëkohësisht, janë proceduar penalisht në gjendje të lirë tre shtetas të tjerë, të cilët u konstatuan duke drejtuar mjetet në momentin e ndërhyrjes së forcave të rendit:
• E. H., 41 vjeç;
• S. U., 27 vjeç;
• K. B., 39 vjeç.
Materialet procedurale i janë referuar Prokurorisë për veprime të mëtejshme, ndërsa hetimet vazhdojnë për kapjen e personave të shpallur në kërkim dhe dokumentimin e plotë të veprimtarisë së dyshuar kriminale.
Përditësime
Policia e Shtetit konfirmoi se ndërhyrja për sekuestrimin e automjeteve luksoze është finalizuar me datë 19 gusht. Ky zhvillim saktëson afatin kohor të operacionit 'Stolen line', i cili çoi në bllokimin e mjeteve të vjedhura në Gjermani.