Policia e Tiranës sekuestroi katër automjete luksoze me vlerë rreth 200 mijë euro, të vjedhura në SHBA, Itali dhe Gjermani, me qëllim shitjen në Shqipëri. Ngjarja ndodhi në kuadër të operacionit policor “Stolen Line”, të zhvilluar nga specialistët e Seksionit për Hetimin e Trafiqeve të Paligjshme në Drejtorinë Vendore të Policisë Tiranë.
Janë nisur procedime penale ndaj dy shtetasve dhe janë shpallur në kërkim dy të tjerë:
- S. C., i dyshuar për trafikimin e një automjeti tip Jeep, të vjedhur në Itali;
- E. Ç., i dyshuar për trafikimin e një automjeti tip Range Rover, të vjedhur në SHBA;
- E. J., i shpallur në kërkim për trafikimin e një automjeti tip BMW, të vjedhur në Gjermani;
- R. R., i shpallur në kërkim për trafikimin e një automjeti tip Seat Cupra, të vjedhur në Itali.
Automjetet u sekuestruan në cilësinë e provës materiale. Materialet procedurale i janë referuar Prokurorisë për veprime të mëtejshme. Operacioni “Stolen Line” vijon për goditjen e veprimtarisë së paligjshme të trafikimit të automjeteve luksoze.