Policia e Tiranës sekuestroi një automjet luksoz tip Mercedes-Benz AMG G63, me vlerë rreth 250 000 euro, i cili nga verifikimet rezultoi i vjedhur në Gjermani. Veprimet u kryen në vijim të operacionit të koduar “Stolen line”, me objektiv goditjen e rasteve të trafikimit në Shqipëri të automjeteve të vjedhura jashtë shtetit.
Si rezultat i punës hetimore dhe operacionale të specialistëve të Seksionit për Hetimin e Trafiqeve të Paligjshme, u konstatua ky rast. Nga veprimet hetimore u identifikua shtetasi A. L., 34 vjeç, i cili dyshohet se ka trafikuar mjetin në Shqipëri me qëllim shitjen. Ai u shpall në kërkim, ndërsa policia po punon për kapjen e tij dhe dokumentimin e plotë të rastit.
Materialet procedurale iu referuan Prokurorisë së Tiranës për veprime të mëtejshme. Operacioni synon mbrojtjen e interesave të pronarëve jashtë vendit dhe goditjen e rrjeteve të trafikut të paligjshëm.