Policia e Shtetit vijon operacionin e koduar Stolen Line, me objektiv goditjen e trafikimit të automjeteve të vjedhura jashtë shtetit në Shqipëri. Specialistët e Seksionit për Hetimin e Trafiqeve të Paligjshme kanë sekuestruar dy automjete dhe kanë shpallur në kërkim dy shtetas të dyshuar për trafikimin e tyre.
Gjatë fazës së sotme u sekuestrua një automjet tip Audi, me vlerë rreth 50 mijë euro, i cili nga verifikimet rezultoi i vjedhur në Sllovaki. Në lidhje me këtë rast u identifikua dhe u shpall në kërkim shtetasi S. Sh., 55 vjeç, i dyshuar se ka sjellë automjetin në Shqipëri me qëllim shitjen.
Ndërkaq, dje u sekuestrua një automjet tip Seat Cupra, me vlerë rreth 40 mijë euro, i cili rezultoi i vjedhur në Itali. Për këtë u identifikua dhe u shpall në kërkim shtetasi G. L., i dyshuar për sjelljen e automjetit në Shqipëri për shitje.
Policia njofton se po punohet për kapjen e të dy shtetasve. Materialet procedurale iu referuan Prokurorisë së Tiranës për veprime të mëtejshme.