Policia e Tiranës, përmes Seksionit për Hetimin e Trafiqeve, finalizuan faza të tjera të operacioneve “Stolen Line” dhe “Relay”, kundër trafikimit të automjeteve dhe transportit ilegal të emigrantëve.
Në kuadër të operacionit “Stolen Line”, nisi procedimi penal për dy shtetas:
- M. S., 36 vjeç, dyshohet se trafikoi një automjet tip Benz, me vlerë rreth 80 000 euro, i vjedhur në Zvicër;
- E. M., 29 vjeç, dyshohet se trafikoi një automjet tip Opel, me vlerë rreth 10 000 euro, i vjedhur në Itali.
Vlera totale e automjeteve është rreth 90 000 euro. Si provë materiale u sekuestruan të dy automjetet e trafikuara.
Në operacionin “Relay”, u arrestua në flagrancë shtetasi O. T., 36 vjeç, banues në Krujë, pasi u kap duke transportuar kundrejt pagesës tre emigrantë që synonin të kalonin ilegalisht drejt shteteve të Bashkimit Evropian. U sekuestrua edhe automjeti i përdorur për këtë transport.
Materialet procedurale iu referuan Prokurorisë së Tiranës për veprime të mëtejshme. Hetimet u zhvilluan si rezultat i punës operacionale dhe operative për goditjen e trafiqeve dhe kalimit të kundërligjshëm të kufijve.