Autoritetet e Kosovës, në bashkëpunim me autoritetet italiane dhe franceze, kanë realizuar një operacion për sekuestrimin e aseteve në vlerë prej 1 milion eurosh. Operacioni, i koordinuar nga agjencitë Europol dhe Eurojust, është pjesë e një hetimi të gjerë për pastrim transnacional të parave që rrjedhin nga trafikimi i drogës.
Bazuar në analizat e materialit të siguruar nga autoritetet italiane, janë identifikuar llogari bankare, prona, automjete dhe interesa biznesi në pronësi të një çifti shtetasish nga Kosova që banojnë në Itali. Çifti në fjalë është arrestuar në Francë gjatë muajit shtator të vitit 2025, pasi policia zbuloi më shumë se 56 kilogramë shufra ari dhe 2.5 milionë euro të fshehura në automjete të modifikuara.
Sipas njoftimit të përbashkët të Prokurorisë Speciale dhe Policisë së Kosovës, këto asete janë të lidhura me një rrjet kriminal transnacional. Në shtator të vitit të kaluar, në të njëjtin kontekst hetimor, autoritetet kishin sekuestruar asete të tjera me vlerë mbi 30 milionë euro.
Hetuesit theksojnë se paratë e gatshme shndërroheshin në ar për të fshehur origjinën e tyre të paligjshme dhe për të lehtësuar transportin ndërkufitar drejt vendeve si Kosova, Turqia dhe Maroku. Kjo skemë ndërlidhet me një grup të strukturuar, i cili më herët ishte identifikuar si rrjet i udhëhequr nga individë të tjerë për pastrimin e të ardhurave kriminale në Itali dhe Francë.