Drejtori i institutit Octopus, Arben Fetoshi, ka reaguar ndaj dekorimit të ish-gjyqtares hetuese serbe, Danica Marinkoviq, nga Kisha Ortodokse Serbe. Sipas Fetoshit, ky veprim shënon vazhdimësinë e politikës së regjimit të ish-presidentit Slobodan Millosheviq, 27 vjet pas ndërhyrjes së NATO-s në Kosovë.
Në një reagim publik, Fetoshi theksoi se dekorimi me Urdhrin e Shën Savës nga Patriarku Porfirije, në përputhje me heroizimin e Milan Radoiçiqit nga presidenti Aleksandar Vuçiq, nuk janë raste të izoluara. Ai vlerësoi se këto veprime janë pjesë e një strategjie për të legjitimuar narrativën serbe mbi luftën.
Sipas Fetoshit, Marinkoviq është dekoruar si “shërbyese e së vërtetës dhe drejtësisë”, ndërkohë që ai pretendon se ajo ka falsifikuar të vërtetën lidhur me masakrën e Reçakut dhe ka legalizuar krimet e luftës. Ai shtoi se ky veprim “e sakralizon trashëgiminë gjenocidale të Serbisë”, ndërsa heroizimi i Radoiçiqit “e legjitimon vazhdimin e dhunës për qëllime hegjemoniste”.
Në fund, Fetoshi bëri thirrje që këto veprime të adresohen vazhdimisht në qendrat kryesore ndërkombëtare të vendimmarrjes, si Uashington, Bruksel e Londër, si dhe në kryeqytetet rajonale, përfshirë Tiranën, Shkupin e Podgoricën.