Deputeti i Partisë Demokratike (PD), Arjan Ndoja, ish-prokuror në Durrës, dëshmoi sot në Gjykatën e Posaçme kundër Korrupsionit dhe Krimit të Organizuar (GJKKO) si viktimë e atentatit të 1 nëntorit 2019 te mbikalimi i Shkozetit. Në këtë proces gjyqësor janë të pandehur Amar Shkëmbi dhe Bledar Polovina. Shkëmbi nuk u paraqit në seancë, por nënshkroi deklaratë se do të përfaqësohet nga avokatët e tij.
Ndoja rrëfeu se në vitin 2019 nuk kishte probleme përveç sulmeve nga figura të larta politike. Ai posedonte një automjet familjar në emër të bashkëshortes, të cilin një muaj para ngjarjes e kishte përdorur Andi Maloku. Të dielën, në orën 7:00 të mëngjesit, Ndoja doli nga shtëpia dhe shkoi në punë me Malokun. Rreth orës 12:00 lëshoi punën dhe u zhvendos në lokal Koral për drekë me persona, mes të cilëve Aleksandër Laho. Qëndruan atje nga ora 13:00 deri rreth orës 16:00.
Grupi u nis me dy automjete drejt urës së Dajlanit. Maloku drejtonte makinën e Ndojës, pasi ky i fundit nuk ndihej mirë, ndërsa Laho ishte në sediljen e pasme. Ndoja nuk konstaton lëvizje të dyshimta deri te gomisteria pranë hyrjes së autostradës. Atje filluan krismat, të cilat zgjati rreth 20 sekonda, pa breshëri, por të ndara, me zhurma nga dy armë.
Automjeti doli nga rruga, goditi barrierat dhe ngeci në kanal. Maloku, i plagosur në shtyllën kurrizore, i dha gaz makinës, telefonoi babanë duke thënë "Na kanë gjujt" dhe u rrëzua sapo hapi derën. Ndoja humbi ndjenjat menjëherë. Ai deklaroi se nuk njeh të pandehurit, as nuk kishte marrë kërcënime apo mesazhe. Emrin e Plaurent Dervishit e njeh nga një procedim të mëparshëm në Durrës, por pa prova konkrete. Për shkak të sulmeve politike, kishte dyshime për survejim nga shërbimet e policisë lidhur me vettingun.
Përditësime
Arjan Ndoja mohoi borxhe ose hakmarrje ndaj askujt.
"S’i kam borxh e s’i kam hyrë në hak kujt," deklaroi ai në GJKKO, duke hedhur poshtë dyshimet për rolin e tij si organizator.
- Aleksandër Laho kishte makinën e tij, por udhëtoi me Ndojën për bisedë.
- Ndoja fillimisht nuk e kuptoi se krismat ishin të shtëna armësh.
- Automjeti ndodhej në krahun e rrugës me ndarës trafiku.