Një shtetas shqiptar 48-vjeçar, i identifikuar si Edmond Tafa, është arratisur nga burgu i Koridhalos në Athinë, duke vënë në alarm autoritetet greke. Ngjarja ka ndodhur mëngjesin e së martës, rreth orës 08:30 – 09:00, gjatë kohës që po kryheshin veprime rutinë për largimin e mbeturinave nga depoja qendrore e materialeve brenda institucionit penitenciar.
Sipas informacioneve paraprake, i dënuari ka shfrytëzuar një moment pakujdesie të personelit, kur dera e depos u hap për nxjerrjen e mbeturinave, duke u larguar me vrap. Ndërkohë, po hetohen rrethanat e plota dhe nëse ka pasur shkelje të procedurave të sigurisë, siç është hapja e njëkohshme e dy dyerve, kanë favorizuar arratisjen.
Shtetasi shqiptar ishte dënuar me 7 vjet e 6 muaj burgim për posedim dhe trafikim të lëndëve narkotike, si dhe për shkelje të ligjit për armët. Kohëzgjatja e dënimit parashikonte lirimin e tij në muajin korrik të vitit 2031. Aktualisht, policia greke po vijon operacionin intensiv për lokalizimin dhe arrestimin e tij, ndërsa po zhvillohen hetime për të sqaruar përgjegjësitë mbi sistemin e sigurisë së burgut.