Strukturat e hetimit të krimit në Drejtërinë Vendore të Policisë Korçë kanë njoftuar arrestimin e 22-vjeçarit Edison Agolli, i cili ishte shpallur në kërkim që prej datës 30 qershor. Agolli akuzohet si bashkëpunëtor në tentativën për vrasjen me armë zjarri të Brian Syzos, ngjarje e ndodhur në qytetin e Pogradecit.
Sipas hetimeve, i riu dyshohet se ka vepruar në bashkëpunim me vëllain e tij dhe dy persona të tjerë. Mbi të rëndon akuza për veprën penale “vrasje me paramendim e kryer për interes, hakmarrje, e mbetur në tentativë dhe e kryer në bashkëpunim”.
Gjatë hetimeve është zbuluar gjithashtu se Edison Agolli kishte vendosur një kamerë sigurie në afërsi të Institucionit të Ekzekutimit të Vendimeve Penale (IEVP) në Drenovë. Ky veprim dyshohet se është kryer me qëllim monitorimin e lëvizjeve të shënjestrës së atentatit, Brian Syzo.
Në të njëjtën kohë, autoritetet kanë ekzekutuar urdhrin e arrestimit edhe ndaj 35-vjeçarit Brian Syzo, i cili mbeti i plagosur gjatë ngjarjes së 30 qershorit. Arrestimi i tij vjen pasi Gjykata e Apelit ka lënë në fuqi një vendim të vitit 2023 nga Gjykata e Pogradecit, që e dënon atë me 3 vite e 4 muaj burgim për veprën penale “prodhim dhe shitje të lëndëve narkotike”.
Përditësime
Policia e Shtetit ka identifikuar Nikolla Agollin si bashkëpunëtorin e dytë në atentatin ndaj Brian Syzos në Pogradec. Hetimet kanë konfirmuar praninë fizike të vëllait të tij, Edison Agolli, në vendngjarje. Në operacion janë përfshirë gjithsej katër persona, ku dy të tjerë mbeten ende nën hetim.