Gjykata e Korçës ka caktuar masën e sigurisë "arrest me burg" për Nikolla Agollin dhe David Priftin, të cilët akuzohen për veprat penale "vrasje me paramendim, në bashkëpunim", mbetur në tentativë, dhe "armëmbajtje pa leje". Plagosja me armë zjarri e Brian Syzos ndodhi mesditën e së hënës në lagjen numër 3 të qytetit të Pogradecit.
Gjatë seancës gjyqësore, e cila zgjati dy orë, i dyshuari Nikolla Agolli pranoi se ka qëlluar ndaj të dëmtuarit, por e cilësoi ngjarjen si një konflikt të çastit. Ai pretendoi se është sulmuar i pari nga Syzo dhe ka qëlluar me qëllim për ta neutralizuar. "Kisha mundësi ta vrisja dhe nuk e bëra", ka deklaruar Agolli para trupit gjykues.
Nga ana tjetër, David Prifti deklaroi pafajësinë, duke pretenduar se nuk ka qenë i pranishëm në vendin e ngjarjes. Sipas versionit të tij, ai ia kishte dhënë automjetin Agollit dhe ishte larguar për në plazh me automjetin e të fejuarës, duke shtuar se kamerat e sigurisë në zonat ku ka kaluar do të vërtetojnë alibinë e tij.
Sipas hetimeve, dyshohet se Syzo është ndjekur nga automjeti i autorëve pas vizitës në Burgun e Drenovës. Motivi i sulmit mbetet hakmarrja, lidhur me një konflikt të mëparshëm të ndodhur në tetor të vitit të shkuar, ku vëllai i Syzos kishte plagosur me thikë Agollin.
Ndërkohë, policia dhe prokuroria vijojnë verifikimin e kamerave të sigurisë për zbardhjen e dinamikës dhe kanë shpallur në kërkim 2 bashkëpunëtorë të tjerë.