Policia e Tiranës ka finalizuar dy operacione për goditjen e veprimtarisë kriminale në lidhje me farat e kanabisit.
Në operacionin e koduar „Procesi”, shërbimet e Komisariatit Nr. 2 ndaluan një automjet në Rruga e Dafinave. Gjatë kontrollit, në mjetin tip Benz që drejtonte 31-vjeçari R. A., banues në Tiranë, u gjet një qese me 1000 fara të dyshuara narkotike të llojit Cannabis sativa. Ai u arrestua në flagrancë, ndërsa farat dhe automjeti u sekuestruan si prova materiale. Materialet procedurale i janë referuar Prokurorisë së Tiranës për veprime të mëtejshme.
Arrestimi i dytë te Kthesa e Kamzës
Në operacionin policor „Seeds”, të organizuar nga Seksioni për Hetimin e Narkotikëve, shërbimet lokalizuan një automjet te Kthesa e Kamzës. Në mjetin e drejtuar nga 66-vjeçari L. K., banues në Tiranë, u gjet një qese me 1000 fara të dyshuara narkotike Cannabis sativa. Pas veprimeve procedurale, L. K. u arrestua në flagrancë dhe farat u sekuestruan si prova materiale. Materialet i janë kaluar Prokurorisë së Tiranës.
Të dy operacionet u zhvilluan si rezultat i informacioneve operative për parandalimin e kultivimit dhe shitjes së bimëve narkotike.