Policia e Vlorës arrestoi dy vëllezër, E. Gj. (27 vjeç) dhe J. Gj. (28 vjeç), të dy banues në Vlorë, pasi dyshohet se në bashkëpunim me njëri-tjetrin dhe një person të tretë kanë hedhur në treg kartëmonedha false, duke blerë vazhdimisht në subjekte të ndryshme në qytet.
Ngjarja u zbulua gjatë operacionit policor të koduar "Fake Cash", të zhvilluar nga specialistët e Seksionit për Hetimin e Krimeve Ekonomike dhe Financiare të Drejtorisë Vendore të Policisë Vlorë, në drejtim të Prokurorisë pranë Gjykatës së Shkallës së Parë të Juridiksionit të Përgjithshëm Vlorë.
Gjykata e Vlorës caktoi masën e sigurisë "arrest në shtëpi" për secilin prej vëllezërve, me vendim të datës 10.02.2026. Ndërkohë, autoritetet vijojnë punën për kapjen e bashkëpunëtorit E. K., 24 vjeç, banues në Tiranë.
Gjatë operacionit u sekuestruan një sasi e konsiderueshme kartëmonedhash dollarë të dyshuara si falsifikuara, të cilat do t'i nënshtrohen ekspertimit, si dhe 4 celularë.
Strukturat e policisë vijojnë hetimet për dokumentimin e plotë të veprimtarisë kriminale dhe identifikimin e shtetasve të tjerë të mundshëm të përfshirë. Materialet procedurale iu referuan Prokurorisë për veprime të mëtejshme.