Pesë persona kanë rënë në prangat e policisë pas një incidenti në një resort në Golem, ku punonjës të Task Forcës së Drejtorisë së Përgjithshme të Tatimeve u penguan gjatë ushtrimit të detyrës. Sipas njoftimit zyrtar, inspektorët tatimorë u mbajtën të mbyllur për një kohë të konsiderueshme brenda ambienteve të biznesit ndërsa po kryenin kontrollet rutinë.
Pas kallëzimit të bërë nga punonjësit e institucionit tatimor, specialistët për Hetimin e Krimit në Komisariatin e Policisë Kavajë kryen arrestimin në flagrancë të pesë personave për veprën penale "Heqja e paligjshme e lirisë".
Personat e ndaluar janë:
• Saimir Ndreca, 34 vjeç, administrator i resortit
• Zaho Jaçaj, 56 vjeç, shef finance
• Artan Kasa, 56 vjeç, shef i sigurisë
• Hamid Sula, 64 vjeç, punonjës sigurie
• Bujar Agolli, 57 vjeç, punonjës sigurie
Materialet procedurale i janë referuar Prokurorisë përkatëse, e cila po vijon veprimet hetimore për zbardhjen e rrethanave të ngjarjes dhe përcaktimin e përgjegjësive ligjore për secilin nga të përfshirët.
Përditësime
Policia e Shtetit ndërhyri në Golem për të liruar pesë inspektorë tatimorë, të cilët u mbajtën të izoluar në një ambient zyre për rreth një orë. Inspektorët njoftuan autoritetet gjatë kohës që po kryenin verifikimet për shlyerjen e detyrimeve financiare dhe dokumentacionin ekonomik të subjektit. Në lidhje me ngjarjen, janë arrestuar pesë persona.
Policia e Shtetit bëri të ditur se administratori Sajmir Ndrecaj është ndaluar pas bllokimit të 5 inspektorëve tatimorë. Kontrolli ishte pjesë e një aksioni më të gjerë për verifikimin e subjekteve në zonën e Golemit.