Autoritetet franceze arrestuan pesë persona, katër burra dhe një grua, pas rrëmbimit të një gjyqtares 35-vjeçare dhe nënës së saj 67-vjeçare. Ngjarja ndodhi në rajonin juglindor të Drôme-s, ku të dyja gratë u mbajtën peng për rreth 30 orë në një garazh dhe u gjetën të plagosura të premten në mëngjes.
Prokurori i Lyonit, Thierry Dran, tha se tre të arrestuarit u kapën gjatë natës dhe dy të tjerët këtë mëngjes. Dy prej tyre u gjetën duke u përpjekur të hipnin në një autobus për në Spanjë. Autoritetet vazhdojnë hetimin për dyshuar të tjerë, ndërsa një burim pranë çështjes tha se gruaja e arrestuar është partnerja e njërit prej burrave.
Rrëmbimi nisi kur partnerja e gjyqtares mori një mesazh dhe foto nga rrëmbyesit, të cilët kërkonin shpërblim në kriptomonedha. Sulmuesit kërcënuan se do t’i gjymtonin viktimat nëse shuma nuk paguhej menjëherë. Kjo çoi në një operacion policor me 160 oficerë.
Viktimat u liruan vetë duke trokitur në derën e garazhit. Një fqinj dëgjoi zhurmën, ndërhyri dhe hapi derën, duke i mundësuar shpëtimin të premten në mëngjes pa paguar asnjë shpërblim.