Policia e Tiranës ka arrestuar në flagrancë 22-vjeçarin A. E., të njohur si Ardian Elezi, në lagjen Bathore të kryeqytetit. Ngjarja ndodhi pas një konflikti për motive të dobëta me 33-vjeçarin B. J..
Sipas njoftimit të Drejtorisë Vendore të Policisë Tiranë, shërbimet e Komisariatit Nr. 5 intervenuan menjëherë pas sinjalizimit për konflikt ndërmjet disa shtetasve. Specialistët për Hetimin e Krimeve të Rënda identifikuan dhe arrestuan të dyshuarin, i cili fillimisht ka përplasur qëllimisht, me automjetin e tij, atë të B. J..
Më pas, A. E. dyshohet se kanosi viktimën duke qëlluar në ajër me armë zjarri. Në bashkëpunim me shtetas të tjerë, ai ushtroi dhunë fizike ndaj 33-vjeçarit, duke e goditur me grushte.
Automjeti i të arrestuarit, tip Range Rover, u sekuestrua si provë materiale. Policia vijon kërkimet për gjetjen e armës së përdorur dhe identifikimin e personave të tjerë të përfshirë në ngjarje.
Materialet iu referuan Prokurorisë së Tiranës për veprime të mëtejshme.