Shërbimet e Komisariatit Nr. 5 të Policisë së Tiranës finalizuan operacionin e koduar “Risku” në zonën e Kamzës. Ngjarja ndodhi në fshatin Çekrezë, ku policia i bëri shenjë ndalimi motomjetit me të cilin lëviznin shtetasit A. K., 23 vjeç, dhe A. A., 18 vjeç, të dy banorë në Kamëz.
Drejtuesi i motomjetit, A. K., nuk iu bind urdhrit dhe vazhdoi lëvizjen me shpejtësi. Pas ndjekjes operative, të dy u kapën dhe u vunë në prangë. Gjatë kontrollit në motomjet u gjet një pistoletë zjarri me municion luftarak dhe një maskë.
Më pas, në banesën e 23-vjeçarit u sekuestruan një armë gjahu dhe një armë sportive. Në total, u sekuestruan 3 armë, maska dhe motomjeti.
A. K. akuzohet për armëmbajtje pa leje dhe mosbindje ndaj urdhrit të policisë, ndërsa A. A. për moskallëzim krimi. Operacioni u zhvillua për parandalimin e ngjarjeve kriminale dhe rritjen e sigurisë publike.
Materialet procedurale iu referuan Prokurorisë së Tiranës për veprime të mëtejshme.