Arrestohet 23-vjeçari nga Kosova në Mikonos për përdhunim

Autoritetet policore në ishullin e Mikonos kanë nisur hetimet për një rast të dyshuar të dhunës seksuale, pas kallëzimit të një turisteje 18-vjeçare italiane. Ngjarja dyshohet se ka ndodhur në një shezlong në një lokal plazhi të njohur, ku e reja ndodhej në shoqërinë e të dyshuarit. Sipas dëshmisë së viktimës, ajo kishte konsumuar sasi të konsiderueshme alkooli, gjendje e cila e bëri atë të paaftë për të reaguar ose për të kundërshtuar. Në denoncimin e saj, 18-vjeçarja ka deklaruar se 23-vjeçari ka përfituar nga kjo gjendje për të kryer marrëdhënie seksuale pa pëlqimin e saj. Pas marrjes së njoftimit, policia greke ndërmori veprime të menjëhershme hetimore për identifikimin dhe lokalizimin e të riut. I dyshuari, shtetas i Kosovës, u identifikua dhe u arrestua në zonën e Platis Gialos. Rasti është tashmë në duart e prokurorisë dhe organeve gjyqësore, të cilat pritet të shqyrtojnë provat dhe pretendimet e palëve në procedurat e mëtejshme ligjore.