Një 21-vjeçar shqiptar, banues prej vitesh në Itali, po hetohet nga autoritetet për akuzën e dhunës seksuale. Ngjarja dyshohet se ka ndodhur në zonën e plazhit Lungomare Spadazzi në Rimini, pas një mbrëmjeje të kaluar në një diskotekë.
Sipas kallëzimit të shtetases gjermane 18-vjeçare, pas konsumimit të alkoolit, i riu e kishte detyruar atë të kryente marrëdhënie seksuale kundër vullnetit të saj, duke shfrytëzuar gjendjen e dehur dhe mbizotërimin fizik. Vajza është paraqitur në komisariatin e policisë të nesërmen për të depozituar denoncimin.
Nga ana tjetër, i riu, i mbrojtur nga avokati Massimiliano Orrù, i ka hedhur poshtë pretendimet, duke deklaruar se çdo afërsi fizike ka qenë e dëshiruar nga të dyja palët. Si shenjë bashkëpunimi me drejtësinë, ai ka dorëzuar vullnetarisht prova biologjike për analizat e nevojshme laboratorike.
Prokuroria e Riminit i ka kërkuar gjyqtarit të hetimeve paraprake zhvillimin e një seance për marrjen e provave, që synon të rindërtojë dinamikën e mbrëmjes dhe të verifikojë rrethanat e kallëzimit. Hetimet janë në fazë fillestare dhe akuzat ndaj 21-vjeçarit mbeten ende të paprovuara.