Policia e Shkodrës zhvilloi operacionin e koduar “Game Over” mbrëmjen e djeshme në një lokal në fshatin Bajzë.
Gjatë kontrollit u konstatua se në lokal shitej lëndë narkotike e dyshuar kokainë dhe organizoheshin lojëra fati. Lokali nuk ishte i regjistruar në organet kompetente.
Në flagrancë u arrestua pronari Gabriel Popaj, 26 vjeç, banues në fshatin Vukpalaj.
Nga lokali u sekuestruan doza kokainë, 4 celularë dhe 1 makinetë për lojëra fati, pije alkoolike të dyshuara si kontrabandë, si dhe një shumë parash të dyshuar si të përfituara nga veprimtaritë e paligjshme.
Operacionin e realizuan specialistët për hetimin e krimeve ekonomiko-financiare dhe narkotikëve, me mbështetjen e forcës së posaçme “Shqiponja” të Drejtorisë Vendore të Policisë Shkodër.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.