Një 28-vjeçar me inicialet A. Xh., banues në Bulqizë, u arrestua nga Policia e Shtetit në Bulqizë. Ngjarja ndodhi në orët e para të mëngjesit të datës 21.02.2026, në një pikë karburanti në fshatin Shupenzë.
Shtetasi dyshohet se paraqitej me një automjet tip Benz, furnizoi mjetin me naftë dhe u largua me shpejtësi pa kryer pagesën, duke rrezikuar jetën e punonjësit të karburantit. Pas kallëzimit të menjëhershëm të punonjësit, Forcat e Posaçme “Shqiponja” pranë Drejtorisë Vendore të Policisë Dibër, në bashkëpunim me Komisariatin e Policisë Bulqizë, organizuan operacionin për identifikimin dhe kapjen e tij.
Si rezultat i reagimit të shpejtë, administrimit të pamjeve filmike dhe provave të tjera, policia identifikoi dhe arrestoi të dyshuarin. Nga verifikimet rezulton se A. Xh. është dënuar më parë në Itali për grabitje dhe është i dëbuar për 10 vite nga ky shtet.
Në cilësinë e provave materiale u sekuestrua automjeti tip Benz, si dhe një kapuç në formë maske. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.