Operacioni policor u zhvillua mbrëmjen e së hënës, rreth orës 19:30, si pjesë e një plani për kapjen e një personi të kërkuar për veprën penale të kanosjes. Në aksion morën pjesë zyrtarë policorë nga Stacioni i Kaçanikut në bashkëpunim me Njësinë e Reagimit të Shpejtë. Gjatë kontrollit në fshatin Dubravë, forcat e rendit gjetën dhe sekuestruan një armë të gjatë gjuetie dhe tri fishekë.
Sipas njoftimit zyrtar, arma e konfiskuar dyshohet se ka lidhje me një video-incizim të siguruar më herët nga hetuesit në lidhje me rastin e kanosjes. I arrestuari V.Q., 34 vjeç, u intervistua në prani të avokatit mbrojtës. Me vendim të prokurorit të shtetit, ndaj tij është caktuar masa e ndalimit prej 48 orësh për kryerjen e procedurave të mëtejme hetimore. Personat e përmendur në këtë rast gëzojnë prezumimin e pafajësisë derisa të vërtetohet fajësia e tyre me një vendim të formës së prerë nga gjykata.