Policia e Sarandës ka njoftuar arrestimin në flagrancë të 37-vjeçarit Aleksandro Hizmo, banues në këtë qytet, në kuadër të operacionit policor të koduar "Administratori". Operacioni u zhvillua pas informacioneve të siguruara në rrugë operative dhe kontrolleve të ushtruara në disa subjekte.
Sipas njoftimit zyrtar, gjatë kontrollit të ushtruar në lokalin që i arrestuari administronte në lagjen nr. 4, si dhe gjatë kontrollit fizik ndaj tij, forcat e rendit gjetën dhe sekuestruan në cilësinë e provës materiale një armë zjarri pistoletë me një krehër me 7 fishekë, si dhe një sasi lënde narkotike të llojit kokainë.
Hetimet paraprake ngrenë dyshime se lënda narkotike posedohej me qëllim shitjen në ambientet e lokalit, ndërsa arma mbahej pa lejen përkatëse. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Sarandë për veprime të mëtejshme penale.