Specialistët për Hetimin e Krimeve në Komisariatin e Policisë Himarë kanë finalizuar operacionin e koduar “Late-night”, pas administrimit të informacioneve operative mbi përshtatjen e një lokali nate në plazhin e Potamit për shitjen e lëndëve narkotike. Si rezultat i ndërhyrjes, u arrestuan në flagrancë pronari i lokalit, shtetasi M. B., 33 vjeç, banues në Tepelenë, si dhe banakieri A. Gj., 20 vjeç, banues në Lazarat.
Nga kontrollet e kryera, shërbimet e policisë gjetën gjatë kontrollit fizik të 20-vjeçarit 5 doza kokainë dhe 8 doza cannabis sativa. Ndërkaq, gjatë kontrollit të ushtruar në banesën e 33-vjeçarit, u gjetën dhe u sekuestruan 145 doza të tjera kokainë, një peshore elektronike, si dhe një armë sportive tip pistoletë, të cilën pronari e posedonte pa lejen përkatëse.
Në total, autoritetet kanë sekuestruar 150 doza kokainë, 8 doza cannabis sativa, një armë sportive, dy celularë dhe një peshore elektronike. Materialet procedurale i janë referuar Prokurorisë për veprime të mëtejshme, ndërsa të arrestuarit akuzohen për veprat penale të prodhimit dhe shitjes së lëndëve narkotike, si dhe mbajtjes pa leje të armëve sportive.