Në kuadër të masave të shtuara për garantimin e rendit dhe sigurisë publike gjatë sezonit turistik, shërbimet e Komisariatit të Policisë Himarë, në bashkëpunim me Seksionin për Hetimin e Narkotikëve, kanë finalizuar dy faza të operacionit antidrogë të koduar "Area".
Operacioni u përqendrua në goditjen e shitjes së lëndëve narkotike në plazhet e Livadhit, Llamanit dhe në lokalet e plazhit (beach bar) të këtyre zonave. Gjatë kësaj ndërhyrjeje janë vënë në pranga tre shtetas:
- Viron Kutulla, 17 vjeç, banues në Himarë.
- Dilaver Gjonça, 40 vjeç, banues në Tiranë.
- Rigers Lekaj, 24 vjeç.
Në kuadër të operacionit "Area 01", policia arrestoi në flagrancë shtetasit Viron Kutulla dhe Dilaver Gjonça. Gjatë kontrollit fizik dhe atij në banesën ku qëndronte përkohësisht 40-vjeçari në fshatin Llaman, u sekuestruan sasi të lëndëve të dyshuara si kokainë dhe kanabis sativa, të ndara në 60 doza, të cilat ishin përgatitur për shitje.
Në fazën e dytë, të koduar "Area 02", u arrestua shtetasi Rigers Lekaj. Gjatë kontrollit në automjetin e tij dhe në banesën ku qëndronte përkohësisht në Himarë, efektivët gjetën 31 doza të tjera kanabis sativa të ndara për shitje, si dhe një peshore elektronike.
Në total, gjatë të dyja fazave të operacionit, policia sekuestroi 91 doza lëndë narkotike, një peshore elektronike, një automjet dhe një celular. Sipas njoftimeve zyrtare, dy prej të arrestuarve kishin marrë banesa të përkohshme në qytetin bregdetar me qëllim kryerjen e kësaj veprimtarie kriminale. Materialet procedurale i janë referuar Prokurorisë për veprime të mëtejshme.