Një konflikt në lagjen “Barrikadë” të qytetit të Beratit, mbrëmjen e djeshme, përfundoi me plagosjen me thikë të një personi dhe arrestimin e autorit të dyshuar.
Sipas njoftimit të Policisë së Beratit, shërbimet e Komisariatit të Policisë Berat reaguan menjëherë pas sinjalizimit për një shtetas të plagosur me mjet prerës dhe mbërritën në vendngjarje.
Si rezultat i veprimeve të shpejta hetimore dhe operacionale, identifikuan dhe vunë në pranga shtetasin Aleandro Toska, 39 vjeç, banues në Berat.
Nga hetimet paraprake, dyshohet se Toska ka goditur me thikë shtetasin D. N., 48 vjeç, gjatë një konflikti për motive të dobëta. I plagosuri ndodhet jashtë rrezikut për jetën.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Berat për veprime të mëtejshme.
Policia po vazhdon hetimet për zbardhjen e plotë të rrethanave të ngjarjes.