Drejtoria Vendore për Kufirin dhe Migracionin në Vlorë, në bashkëpunim me Prokurorinë, ka zbardhur tentativën e trafikimit të emigrantëve drejt Italisë. Shtetasi afgan M. E., 43 vjeç, është arrestuar në flagrancë me akuzën për veprën penale “Ndihma për kalim të paligjshëm të kufijve”.
Nga hetimet rezulton se skema kishte nisur që nga Greqia, prej nga organizatori kishte udhëzuar futjen e 10 emigrantëve në territorin shqiptar përmes kufirit të gjelbër. Pas mbërritjes në Shqipëri, grupi u drejtua për në Seman të Fierit, ku morën mjetin lundrues të siguruar nga një bashkëpunëtor shqiptar, identiteti i të cilit mbetet ende i panjohur për organet hetimore.
Udhëtimi drejt Italisë u ndërpre në det të hapur, pranë ishullit të Sazanit, kur mjeti lundrues rrezikoi të mbytej. Të 10 emigrantët e huaj që ndodheshin në bord janë proceduar penalisht për “Kalim të paligjshëm të kufirit shtetëror”. Policia vijon hetimet intensive për lokalizimin e bashkëpunëtorit shqiptar dhe për të zbuluar nëse ka persona të tjerë të implikuar në këtë rrjet të kontrabandimit të qenieve njerëzore.
Përditësime
Forcat speciale Delta kanë marrë pjesë drejtpërdrejt në operacionin e shpëtimit dhe arrestimit në det. Sipas policisë, 43-vjeçari afgan u kap në bordin e gomones gjatë ndërhyrjes. Hetimet zbuluan se shtetasi shqiptar i arrestuar kishte dërguar koordinatat e sakta për nisjen e mjetit nga bregdeti i Semanit.