Gjatë mëngjesit të sotëm, policia greke zhvilloi një operacion antidrogë në zonën kufitare të Igumenicës, duke çuar në sekuestrimin e një sasie prej 109 kg e 364 gramë marijuanë. Lënda narkotike ishte ndarë në 102 pako, të cilat ishin fshehur në sediljet e pasme dhe në bagazhin e një automjeti.
Shtetasi turk 43-vjeçar që drejtonte mjetin është arrestuar në vendngjarje, ndërsa autoritetet greke kanë nisur hetimet për të zbardhur rrjetin e bashkëpunëtorëve dhe origjinën e lëndës narkotike, për të cilën dyshohet se është marrë përmes kufirit të gjelbër.
Sipas të dhënave zyrtare, që nga shtatori i vitit 2025, policia greke ka sekuestruar mbi 1.1 ton drogë të dyshuar se ka ardhur nga ky kufi. Rastet e trafikimit janë shënuar kryesisht në Igumenicë, si në rrugë tokësore ashtu edhe detare, por sekuestrime ka pasur edhe në qytete të tjera si Janinë, Selanik dhe Kostur.