Forcat e rendit në Korçë kanë vënë në pranga Bilal Mullallin, 59 vjeç, banues në fshatin Zëmblak të bashkisë Maliq. Arrestimi i tij është kryer në kuadër të një operacioni të organizuar nga Drejtoria Vendore e Policisë së Korçës.
Sipas njoftimit zyrtar, i dyshuari është ndaluar për kontroll në kryqëzimin e fshatit Dishnicë. Gjatë kontrollit në automjetin e tij, shërbimet e policisë gjetën dhe sekuestruan një armë zjarri të llojit pistoletë.
Burimet policore bëjnë me dije se 59-vjeçari ishte nën vëzhgim prej kohësh, për shkak të dyshimeve mbi mbajtjen e armëve të zjarrit në mënyrë të paligjshme. Gjithashtu, bëhet e ditur se shtetasi në fjalë rezulton me precedentë të mëparshëm penalë. Policia po vijon hetimet për zbardhjen e plotë të rrethanave të ngjarjes.