Karabinierët italianë arrestuan Roberto Mazzarellën, kreun 48-vjeçar të klanit me të njëjtin emër të Kamorrës në Napoli, në një resort luksoz në Vietri sul Mare, provincën e Salernos në Bregun Amalfitan. Ngjarja ndodhi gjatë festave të Pashkëve, kur ai qëndronte me bashkëshorten dhe fëmijët, i regjistruar me identitet të rremë në një vilë që kushtonte rreth 1 mijë euro për natë.
Mazzarella ishte shpallur në kërkim që nga 28 janari 2025, pas një urdhri paraburgimi nga Gjykata e Napolit me kërkesë të Drejtorisë Antimafia. Ai renditej i katërti në listën e të arratisurve më të rrezikshëm nga Ministria e Brendshme italiane. Akuzohet për vrasje në rrethana mafioze, përfshirë një krim në vitin 2000 në kuadër të hakmarrjes mes klanit të tij dhe Alleanza di Secondigliano. Viktima Antonio Maione lidhet me familjen e Ivan Maiones, të dyshuar për vrasjen e babait të Mazzarellës, Salvatore Mazzarellës.
Hetuesit e Njësisë Hetimore të Komandës Provinciale të Napolit, të koordinuar nga Drejtoria Antimafia, identifikuan vendndodhjen përmes pranisë në rrjetet sociale, gjurmeve dixhitale dhe analizës së transaksioneve financiare të familjarëve. Mazzarella nuk bëri rezistencë gjatë arrestimit.
Në vilë autoritetet sekuestruan tre orë luksoze, rreth 20 mijë euro në para cash, dokumente të falsifikuara, telefona inteligjentë dhe dorëshkrime që dyshohet se lidhen me aktivitetin financiar të klanit. Materialet do të hetohen më tej.