Një gardian i burgut me inicialet S.D. është arrestuar më 2 shkurt në Qendrën Korrektuese të Dubravës, ku autoritetet parandaluan një tentativë për futjen e substancave narkotike.
Pas informacioneve nga institucionet e sigurisë, u zhvillua një kontroll i qëllimshëm në hyrje të institucionit. Gjatë këtij kontrolli, tek S.D. u gjetën të fshehura substanca të dyshuara narkotike, të cilat dyshohet se synoheshin për t'u futur brenda qendrës.
Menjëherë pas zbulimit, u njoftuan Policia e Kosovës dhe Prokurori i Shtetit, të cilët arrestuan të dyshuarin në vendin e ngjarjes. Rasti po trajtohet sipas procedurave ligjore nga organet kompetente.
Shërbimi Korrektues i Kosovës (SHKK) mori masa të menjëhershme disiplinore ndaj zyrtarit. Komisioni Disiplinor i SHKK-së vendosi pezullimin e tij nga detyra, masa që mbetet në fuqi deri në një vendim tjetër përfundimtar.
Në njoftimin zyrtar, SHKK thekson se nuk do të tolerojë shkelje të ligjit apo abuzime me detyrën zyrtare dhe mbetet i përkushtuar në parandalimin e dukurive negative që rrezikojnë sigurinë e institucioneve korrektuese.
Përditësime
IndeksOnline: Emri i plotë i zyrtarit korrektues të arrestuar në Dubravë është Sebastian Delijaj.
Prokuroria Themelore në Pejë ka parashtruar kërkesë për caktimin e masës së paraburgimit ndaj gardianit S.D., konfirmoi zëdhënësi Shkodran Nikçi. Kërkesa synon të sigurojë procesin penal gjatë hetimit të rastit.