Shërbimi Korrektues i Kosovës (SHKK) njoftoi se ka parandaluar një tentativë për futjen e sendeve të kundërligjshme në Qendrën Korrektuese të Dubravës. Aksioni u realizua pas informacioneve të siguruara nga Njësia e Inteligjencës Korrektuese (NJIK), në bashkëpunim me Departamentin e Sigurisë së Qendrës Korrektuese të Dubravës dhe institucionet e tjera të sigurisë.
Gjatë bastisjes së planifikuar, e cila rezultoi e suksesshme, zyrtarët korrektues gjetën dhe sekuestruan:
- 6 telefona mobilë
- 480 gramë substancë të dyshuar
Lidhur me rastin është njoftuar Policia e Kosovës, e cila ka ndërmarrë veprimet e mëtejshme procedurale dhe ka kryer sekuestrimin e materialeve. Në anën tjetër, Shërbimi Korrektues i Kosovës ka nisur hetimet e brendshme për të zbardhur të gjitha rrethanat e rastit.
Institucioni thekson se mbetet i përkushtuar në luftimin e dukurive të kontrabandës dhe në forcimin e sigurisë në të gjitha institucionet korrektuese të vendit.