Gjatë një operacioni të sigurisë në Qendrën e Paraburgimit në Prishtinë, zyrtarët korrektues kanë identifikuar dhe sekuestruar sende të ndaluara. Aksioni u ndërmor bazuar në informatat e siguruara nga Njësia e Inteligjencës Korrektuese dhe Sektori i Sigurisë, me qëllim parandalimin e futjes së kontrabandës në institucion.
Kontrollet janë shtrirë në hapësirat e brendshme dhe në perimetrin e objektit. Gjatë këtij procesi, punonjësit e sigurisë gjetën një telefon të vogël, të llojit "mini", së bashku me pajisjet përcjellëse për mbushje, si dhe një substancë e cila dyshohet të jetë lëndë narkotike. Të gjitha gjetjet janë konfiskuar dhe janë dërguar për procedim të mëtejshëm te Policia e Kosovës.
Shërbimi Korrektues i Kosovës deklaroi se këto kontrolle janë pjesë e angazhimit të vazhdueshëm për ruajtjen e sigurisë dhe parandalimin e dukurive të kundërligjshme brenda institucioneve korrektuese. Institucioni konfirmoi se masat parandaluese do të vijojnë në mënyrë të rregullt në të gjitha qendrat e paraburgimit në vend.