Halil Hysaj, 30 vjeç, shqiptar rezident në Itali, u arrestua në flagrancë në Pikën e Kalimit Kufitar Rinas, ndërsa tentonte të trafikonin armë zjarri drejt Italisë.
Shërbimet e Policisë Kufitare të PKK Rinas, në bashkëpunim me shërbimet e sigurisë së aeroportit, finalizuan operacionin policor të koduar “Siguria”. Gjatë kontrollit në dalje të Shqipërisë, skaneri zbuloi në bagazhet e të arrestuarit një armë zjarri pistoletë me municion luftarak, e cila u sekuestrua si provë materiale.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme kundër veprës penale “Trafikimi i armëve dhe i municionit”.
Policia thekson se kontrolli intensifikohet në bazë të analizës së riskut dhe inteligjencës policore, për të garantuar lëvizjen e lirë të shtetasve dhe për të parandaluar paligjshmëritë kufitare.