Policia Kufitare e Rinasit ka arrestuar në flagrancë 42-vjeçarin Sokol Krasniqi, i cili po tentonte të largohej nga Shqipëria drejt Mbretërisë së Bashkuar. Gjatë kontrollit me skaner në bagazhet e tij, shërbimet e sigurisë gjetën një armë zjarri pistoletë me municion luftarak, e cila kishte një fishek në fole dhe gjashtë të tjerë në karikator.
Shtetasi Krasniqi, i cili ka nënshtetësi britanike dhe jeton prej vitesh në Angli, po udhëtonte së bashku me bashkëshorten dhe katër fëmijët e tij të mitur. Në dëshminë e tij pas arrestimit, 42-vjeçari u shpreh se arma i kishte mbetur aksidentalisht në çantë. Ai pohoi se gjatë qëndrimit për pushime në zonën e Tropojës, kishte zhvilluar qitje me disa miq të tij dhe kishte harruar ta nxirrte pistoletën nga bagazhi përpara udhëtimit.
Materialet procedurale i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Tiranë. Ndaj tij rëndon akuza për veprën penale të “Trafikimit të armëve dhe të municionit”. Hetimet për zbardhjen e plotë të rrethanave të këtij rasti vijojnë nga autoritetet kompetente.