Autoritetet në Belgjikë kanë vënë në pranga Gerd Gjinararin, i njohur si “Gert Gjenerali”, i cili ishte shpallur në kërkim ndërkombëtar. Arrestimi pason dënimin e tij me burgim të përjetshëm për vrasjen e Naim Zyberit, ngjarje e ndodhur në vitin 1997 në një spital në Milano, Itali.
Sipas hetimeve, Gerd Gjinarari dhe Arben Grori hynë në dhomën ku kurohej Naim Zyberi duke u paraqitur si familjarë. Ata kryen ekzekutimin me armë zjarri, të cilën e kishin fshehur brenda një buqete me lule. Pas vendimit të drejtësisë italiane, Gjinarari u ekstradua drejt Shqipërisë në vitin 2014 për të vuajtur dënimin.
Në vitin 2019, Gjykata e Korçës mori vendimin për lirimin e tij me kusht, një masë që ngjalli reagime të shumta në opinionin publik. Ky vendim u rrëzua më pas nga Gjykata e Apelit, e cila urdhëroi rikthimin e tij në burg për të shlyer pjesën e mbetur të dënimit. Pas këtij vendimi, Gjinarari nuk u paraqit për ekzekutimin e masës së sigurisë dhe u largua nga vendi, duke u shpallur në kërkim ndërkombëtar. Pas ndalimit në Belgjikë, pritet të nisin procedurat për ekstradimin e tij drejt Shqipërisë.