Një shtetas kosovar, F.A., 34-vjeç, u arrestua nga Policia Kufitare në pikën kufitare Morinë të Kukësit më 19 mars, ndërsa përpiqej të hynte në Shqipëri.
Ai rezulton i shpallur në kërkim ndërkombëtar nga autoritetet holandeze. Gjykata e Limburgut në Holandë e ka dënuar me 1 vit e 6 muaj burgim për veprat penale "Pastrimi i parave" dhe "Posedimi i lëndëve narkotike të forta".
Arrestimi u bë në kuadër të kontrolleve për goditjen e paligjshmërive në kufi dhe ndalimin e personave në kërkim. Shërbimet e Policisë Kufitare të Morinës, në bashkëpunim me Drejtorinë Vendore të Policisë Kukës, kryen verifikimet dhe konfirmuan statusin e tij përmes informacionit të shkëmbyer me Interpol Tiranën.
Pas prangosjes, u njoftua Interpol Tirana, e cila, në bashkëpunim me homologët holandezë, ka nisur procedurat për ekstradimin e 34-vjeçarit drejt Holandës për vuajtjen e dënimit.