Operacioni policor i koduar "FAST", i zhvilluar nga Drejtoria e Forcës së Posaçme Operacionale në bashkëpunim me autoritetet italiane, bëri të mundur lokalizimin dhe arrestimin e 48-vjeçarit Bekim Nikolli në zonën e Institutit Bujqësor në Tiranë.
Sipas njoftimit zyrtar të Policisë së Shtetit, shtetasi ishte shpallur në kërkim ndërkombëtar pasi drejtësia italiane e ka dënuar me 13 vjet burgim për veprat penale "Shfrytëzimi i prostitucionit" dhe "Skllavërimi/Nënshtrimi". Dënimi është dhënë nga Gjykata e Apelit e Napolit në nëntor të vitit 2021.
Hetimet e autoriteteve italiane zbardhën se i arrestuari, në bashkëpunim me persona të tjerë, shfrytëzonte për prostitucion gra të futura në mënyrë të paligjshme në Itali. Për të maksimizuar fitimet dhe për t'i mbajtur viktimat nën kontroll, ai dyshohet se përdorte dhunë dhe forma të ndryshme presioni ndaj tyre.
Aktualisht, Interpol Tirana po vijon procedurat ligjore për ekstradimin e shtetasit Bekim Nikolli drejt Italisë, ku ai do të vuajë dënimin e dhënë nga gjykatat italiane.