Specialistët për Hetimin e Krimeve në Komisariatin e Policisë Nr. 6 kanë prangosur 37-vjeçarin Mirjan Hasa, pronar i një servisi automjetesh në zonën e Astirit, Tiranë. Operacioni i koduar "Skema" u finalizua pas kallëzimeve të qytetarëve, të cilët kishin paguar për shërbime riparimi, por automjetet e tyre nuk ishin rregulluar e as nuk u ishin kthyer në kohën e duhur.
Sipas hetimeve, përveç moskryerjes së shërbimeve, i arrestuari dyshohet se ka tentuar të shesë automjetet që klientët i kishin lënë në servis për riparim, pa autorizimin apo dijeninë e pronarëve. Në kuadër të këtij operacioni, policia ka sekuestruar 5 automjete, të cilat u janë lënë në ruajtje pronarëve ligjorë.
Aktualisht, autoritetet kanë dokumentuar 6 raste të kësaj veprimtarie, ndërsa vijon puna për të verifikuar nëse i arrestuari është përfshirë në episode të tjera. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme mbi veprën penale të "Mashtrimit".