Autoriteti Rrugor Shqiptar (ARRSH) ka njoftuar sot hapjen e dy procedurave të prokurimit për ndërtimin e Bypass-it të Elbasanit, pjesë e rrugës lidhëse Tiranë–Elbasan me Korridorin VIII.
Procedura e parë, Faza 1, ka fond limit prej 3,3 miliardë lekësh, ndërsa Faza II prej 2,5 miliardë lekësh, duke e çuar totalin në rreth 60 milionë euro, sipas dokumenteve të publikuara. Burime të tjera e përcaktojnë fondin limit në 60,5 milionë euro për të dy fazat.
Ky segment rrugor ka gjatësi 4,2 km dhe fillon në fshatin Bradashesh, ku përfundon autostrada Tiranë–Elbasan, duke vazhduar drejt jug-perëndimit, afër luginës së lumit Shkumbin. Rruga ndjek kryesisht gjurmën e Bypass-it ekzistues sipas Planit të Përgjithshëm Vendor të Bashkisë Elbasan, me devijime të vogla për të përmbushur standardet e një autostrade ndërurbane të kategorisë A.
Terreni është fushor, me kuota nga 100 deri në 150 metra mbi nivelin e detit. Projekti merr parasysh kushtet hidrologjike, gjeologjike dhe urbanistike për të garantuar siguri dhe qëndrueshmëri.
Fluksi mesatar ditor i automjeteve varion nga 25 000 në 30 000, duke arritur 35 000 në orët e pikut. Ndërtimi synon të reduktojë trafikun në qendër të Elbasanit, të shkurtojë kohën e udhëtimit dhe të përmirësojë sigurinë rrugore.
Afati për dorëzimin e ofertave është deri më 10 qershor 2026. Fituesi do të ketë 2 vite për përfundimin e punimeve. Dokumentet kërkojnë masa për menaxhimin e trafikut gjatë ndërtimit, duke krijuar rrugë alternative për automjetet dhe këmbësorët.
Kostoja totale e projektit Bypass-it të Elbasanit parashikohet 240 milionë euro, siç është përcaktuar në programin qeveritar të politikave prioritare.