Artan Hoxha paraqiti të hënën në Prokurorinë e Posaçme kundër Korrupsionit dhe Krimit të Organizuar (SPAK) kasetën origjinale me audioregjistrim lidhur me vrasjet gjatë protestës së 21 janarit 2011, ku humbën jetën katër persona.
Në një deklaratë për mediat jashtë SPAK-ut, gazetari shpjegoi se materiali është regjistruar me një diktofon, ku dëgjohet qartë zëri i komandantit të Gardës që jep urdhra para, gjatë dhe pas momentit të vrasjeve në bulevard. "Materiali që është dorëzuar sot është kaseta origjinale e regjistruar në audio ku dëgjohen qartësisht urdhrat që janë dhënë nga komandanti i Gardës", tha Hoxha.
Sipas tij, ky regjistrim ofron një indicie drejt provës, duke treguar se vrasjet nuk ndodhën nga pakujdesia, siç u cilësuan nga gjykatat e mëparshme, por me urdhër nën një hierarki komanduese që drejtonte forcat e Gardës. Më herët, Hoxha kishte paraqitur një kasetë tjetër, e cila ende nuk është ekspertuar.
Gazetari insistoi në mbrojtjen e burimit, duke e cilësuar atë si faktor vendimtar që ka bërë një shërbim të madh vendit. "Për mua merr shumë rëndësi mbrojtja e këtij burimi. Është një burim që i ka bërë një shërbim të madhe vendit, rëndësia e tij është e madhe sepse denoncon një krim shtetëror", deklaroi Hoxha.
Ky dorëzim vjen në vijim të një procedure të hapur nga SPAK, ku gazetari ka dhënë më parë deklarime për ngjarjet konkrete. Regjistrimi pritet të verifikohet, ndërsa Hoxha ngriti shqetësimin për parashkrimin e mundshëm të disa veprave penale pas 16 vitesh nga ngjarja.