Gazetari Artan Hoxha u shpreh në emisionin "Off the Record" me Andrea Dangllin në A2 CNN se dy në tre persona në burgje janë të pafajshëm, pasi mbahen si të paraburgosur pa vendim të formës së prerë.
Ai komentoi deklaratat e kryeministrit Edi Rama në mbledhjen e grupit parlamentar të Partisë Socialiste, ku u fol për ndryshime në Kodin e Procedurës Penale. Sipas Hoxhës, Rama fajësoi gjykatën dhe jo SPAK-un, ndërsa i njëjti shqetësim nuk u ngrit për qytetarët e thjeshtë të burgosur për fatura energjie, gramin e kanabisit apo parkim të dyfishtë.
Hoxha e cilësoi këtë situatë pasojë të politikave penale të ndjekura për katër mandate qeverie. Ai theksoi se kostoja për mbajtjen e të paraburgosurve, minimumi 50 euro në ditë për person, rëndon mbi taksapaguesit, të cilët nuk marrin shërbim të duhur nga drejtësia.
"Kjo është fryma që ti si kryeministër ke përçuar te organet e drejtësisë. Qeveria harton politika penale, sepse të gjithë të arrestuar sot janë kosto e qytetarëve të lirë", tha Hoxha.
Ai përmendi rastin e një qytetari në Lushnjë, i cili u vetëvrar në burg pas arrestit për një detyrim prej 30 mijë lekësh për energji elektrike. "A mbajti njeri përgjegjësi për atë?", pyeti gazetari, duke theksuar mungesën e alternativave ligjore për masa sigurie.